"Rapport" terug

JJ's final blog for Varsity Cup 2010...

FNB Varsity Cup — Wed, 31 Mar 2010 08:55:00 GMT

So eindig ‘n mens mos ‘n kompetisie! En ai tog, moet ons regtig nog ‘n jaar wag voordat dit weer kan gebeur?
Vanjaar se Varsitybeker het beloof om beter en groter te wees en dit het sy belofte gestand gedoen. Dit was ongelooflik.
Iets wat natuurlik baie daarmee te doen het, is die feit dat Stellenbosch ‘n ‘show’ kan opsit.
Eerstens is daar die natuurlike amfiteater wat die Danie Craven stadion jou bied. Met die berge in die agtergrond, die maan wat so duidelik in die donker naglig gehang het, die volgepakte paviljoene, met mense wat teen die berghange ook uitkamp om rugby te kyk, die aksie op die veld....
‘n Mens moet ook die Matie-studente krediet gee. Hulle ken hulle rugby, hulle ken van finale en hulle ken van paartie. Dit is alles bydraende, maar ewe belangrike fakore wat die dag so ‘n merkwaardige een gemaak het. Soos hulle spontaan tussen die geblêr van die agtergrond musiek deurgesing het – dit is lente...in die Boland...by die Stellenbosch studente....
Dan het die twee regte spanne in die eindstryd gespeel. Die Maties was verreweg vanjaar die beste span in die kompetisie en is welverdiende wenners. Die Ikeys het gewys hulle het die durf, maar dalk nog nie die taktiese oordeel om hulle aartsvyande te klop nie.
Nie enige ander twee spanne in die kompetisie se speelstyle vul mekaar so goed aan soos die twee nie en dit het weereens vir ‘n fantastiese rugbywedstryd gesorg.
Daar wag nuwe uitdagings vir die organiseerders en vir die deelnemers. Soos ek Francois Pienaar, Duitser Bosman en Jurie Roux en sy bestuur ken, sal daar weer innovasie wees in 2011. Vanjaar se pienk broek-veldtog verdien erkenning.
Die belangrikste gaan egter wees dat die speelveld ten alle tye gelyk moet wees vir al die spanne, maar dan ook, die spanne moet hulself ‘n gelyke kans gee.
Hierdie is ‘n uitdaging aan die Pukke, UJ, Tukkies, NMMU en TUT om in 2011 die AANBIED van die finaal julle doelwit te maak. Ek het doelbewus die Shimlas uitgelos, want ek dink het hulle het gatgeskop in 2010 en was beslis die span wat die meeste verbeter het. Hulle gaan in 2011 beslis ‘n harde neut wees.
Terloops, geluk ook aan Vishuis. Hulle het Dagbreek redelik maklik verslaan, ondanks die Stellenbosch-manne se uitstekende ondersteuning langs die veld.
Daar was twee dinge wat my bybly van die finaal. Een was ‘n oud-koshuismaat van my en deesdae Huis Marais op Stellenbosch se afrigter, Ben Malan, se vasbenadenheid dat ‘die Huis’ volgende jaar in die eindstryd van die koshuis-afdeling gaan speel.
Die ander was ‘n onbekende kêrel wat desperaat was vir kaartjies om die eindstryd te sien.
Dit vertel jou alles van wat Varsitybeker vir mense geword het. Mag dit lank so voortduur!

Varsity Cup by JJ...

FNB Varsity Cup — Wed, 24 Mar 2010 08:11:00 GMT

En daar bly die twee gunstelinge toe wel oor. Waar die Maties egter weer 'n keer gewys het hoeveel ligjare daar tussen hulle en die Pukke is op die oomblik, het die Shimlas die Ikeys tot in die laaste minuut beveg.

Ek het gedink die Shimlas gaan in die tweede helfte nog genoeg woema hêom die Ikeys in te katrol, maar danksy die skitterspel van JJ Gagiano en kie, kon hulle die Shimlas tot genoeg foute dwing om seker te maak van die oorwinning.

Ek het amper al vergeet watter fantastiese speler Gagiano is. Hy hoef maar net sy kamermaat te kry om so 'n paar minute van elke wedstryd in vanjaar se toernooi op 'n CD te sny en dit Boulder toe te pos.

Dit is natuurlik die hoofkwartier van USA Rugby en die USA Eagles,'n span wat beslis Gagiano weer sal nadertrek met die oog op volgende jaar se Wêreldbeker-toernooi.

Daar was natuurlik 'n paar ander 'uitlanders' ook in vanjaar se kompetisie wat dalk in die toekoms vir hulle geboorteland kan uitdraf. Tukkies het twee gehad in Tendaiyi Chikukwa en Dan Nicols, wat nog vir Zimbabwe kan uitdraf, terwyl Aranos Coetzee by die Puk seker ook al begin wonder het of hy Wêreldbekerdrome saam met Namibië kan droom.

Die probleem in sy geval is dat dit een plek is waar die Biltongboere nogal baie spierkrag het.

Daar is beslis ook spelers van Varsity Cup 2010 wat in die toekoms 'n Springboktrui oor die kop gaan trek.

Tim Whitehead se goeie vertoning in sy debuutwedstryd vir die Stormers sal ook geen skade doen aan Varsity Cup se aansprake dat hulle 'n teelaarde is vir toekomstige sterre nie.

Daar was 'n hele paar van hulle vanjaar en dit sal interessant wees om te sien wie wel vanjaar 'n volgende tree gaan neem en byvoorbeeld Curriebekerrugby gaan speel.

Ek kan seker nie langer uitstel nie en reken dis tyd om my SA Varsitybekerspan te kies. Hier en daar het ek effens vorentoe gekyk en is iemand soos Marcel van der Merwe van Kovsies se insluiting geskoei op die feit dat ek seker is hy gaan Springbok word en nie omdat hy net 'n paar wedstryde vir die Vrystaatse span gespeel het nie. Die res van die tyd was hy natuurlik nie beskikbaar nie weens sy SA o.20-verpligtinge. Gagiano is uiteraard nie beskikbaar nie.

Reg, hier is my span: Therlow Pietersen (Ikeys), Lolo Waqa (UJ), Danie Poolman (Maties), Tim Whitehead (Ikeys), Justin van Staden (Tukkies), Conrad Hoffman (Maties), Andries Mahoney (Pukke), Boom Prinsloo (Shimlas), Josh Strauss (Maties), Justin Wheeler (UJ), Cornell Hess (Tuks), Andrew Prior (Maties), Louwrens Adriaanse (Maties, k), Edgar Marutlulle (UJ), Marcel van der Merwe (Shimlas).PLAASVERVANGERS: Matthew Dobson (Maties), Stoof Bezuidenhout (Pukke), Marinus Pretorius (Maties), Tertius Daniller (Maties), Stuart Commins (Ikeys), Marcel Brache (Ikeys), Shaun Davids (Tuks).

Latest blog post...

FNB Varsity Cup — Thu, 18 Mar 2010 09:51:00 GMT

Vier afrigters het ‘n paar harde lesse geleer tydens die kompetisie en sal seker oor hulle skouers loer vir die messe wat uit is oor nóg ‘n mislukte poging.

Freddie Grobler by Tukkies het vir die eerste keer nié die halfeind gehaal nie, so daar sal diegene op die Tukkies-kampus wees wat meen hy boer agteruit. Ook Hugo van As se posisie moet onder druk wees nadat UJ weer nie die laaste vier kon haal nie. Ek wil nie vingers wys nie, maar UJ was vir my die grootste teleurstelling.

Daar is nie veel van TUT en NMMU verwag nie, die spanne het immers verlede seisoen in dieselfde plekke geëindig. Tog sal die rugbyowerhede daar ook ‘n paar besluite moet neem met die oog op die toekoms.

Ons verwys graag na spelers wat dié toernooi gebruik om ‘n naam vir hulself te maak en het in die verlede gesien dat ouens soos Mat Proudfoot en Robbie Fleck weens hulle bydraes as afrigter vinnig vordering gemaak het.

Het ons vanjaar sulke afrigters op dié vlak gesien? Was daar nuwighede, innovasie en deurlopendheid? Sonder om vingers te wys, gaan kyk maar watter afrigters het heeltyd spanne geskommel, kapteins die trekpas gegee en spelers in verskillende posisies laat speel. Dit is soos hulle sê, ‘n benoude haas maak benoude spronge!

Dit is ironies dat die spanne wat die swakste gevaar het, individueel van die grootste puntemakers opgelewer het.

Conrad Hoffmann het die meeste punte aangeteken na die groepwedstryde, al het hy nie eens in al die wedstryde gespeel nie. Maar enige man wat 22 doelskoppe kon deurklits, sal onder die voorste puntemakers wees. Trouens, Maties het amper nie een ‘n skopper vanjaar nodig gehad nie!

Worsie Kotze van die Pukke, ‘n ander span wat onderpresteer het, is tweede op die lys (72 punte), met Jaco Oosthuizen (TUT, 69), Justin van Staden (Tuks, 69) en Willem Laubscher (NMMU, 68) die volgendes op die lys.

Behalwe Van Staden, wat nog ‘n hele paar drieë ook ingeryg het, het die res se punte van strafdoele gekom. Dit wys dat hulle spanne se deurdringingsvermoë nie goed genoeg was nie en dat daar eerder op skoppe teruggeval is om punte te verseker.

Ek was verlede week in die kol met my voorspellings, so gaan kyk of my geluk hou. Ek meen Maties gaan wéér die Pukke klop, dié keer met ‘n redelike groot telling en Shimlas gaan die Ikeys verras. Wat natuurlik weer die finaal op Stellenbosch gaan verseker.

Ek sal maar nog ‘n week wag voor ek my finale Varsitybekerspan kies. Dit is nie maklik nie.

Maar hier is ‘n vragie. Hoe op dees aarde het die Pukke vir Lolo Waka laat gaan? Sy vakkeuses kon nie só sleg gewees het nie, kon dit?

J.J. Harmse

Sports Writer

JJ's...

FNB Varsity Cup — Wed, 10 Mar 2010 07:37:00 GMT

Het die Maties nog ‘n swak wedstryd in hulle of was die een teen Ikeys die vrotste wat hulle vanjaar gaan speel?

Dit kan dalk na ‘n onsinnige vraag klink, want die Maties was weereens uitstekend en het welverdiend gewen.

Die punt wat ek wil maak met daardie vraag is dat elke span ‘n afdag het.

Net soos Tiger Woods nie elke toernooi kan wen waarin hy speel nie – al is hy verreweg die beste speler in die wêreld – net so kan geen span elke wedstryd wen waarin hy speel nie, al is hy skynbaar strate beter as die res van sy teenstanders.

Die Maties het ‘n bietjie teen die Shimlas gesukkel, maar dit kan ook aan die besoekers se vertoning én die sterk wind daardie dag toegeskryf word.

Wanneer gaan hy sy ‘afdag’ kry? In die semifinaal? Of in die finaal?

Wel, as ‘n oud-Matie sal ek verkies dat dit eerder komende Maandagaand in Potchefstroom sal wees.

Dan weet ek ten minste wat om te verwag vir die twee belangrike weke daarna!

Ek dink enige Puk-ondersteuner sal ook verkies dat die Maties nie op al sy kanonne vuur nie, want as die Pukke daardie een deurtrek kan hulle die ander tuis-semi aanbied.

Komende Maandag se top vier – of dan minstens die tweede tot vierde plekke – sal eers met die heel laaste wedstryd van die gewone rondtes bepaal word.

Dit is presies wat jy van ‘n toernooi van dié aard verwag.

Ja, die NMMU en TUT is ver agter, maar al klaar beter as verlede jaar. Hulle speel toevallig vir die houtlepel, so ook in dié wedstryd is daar baie op die spel.

Maar hulle en Tuks se wedlope is geloop en vir die res van die spanne gaan dit eintlik kwarteindstryde wees, al het die kompetisie nie so iets nie.

Tuks kan die Ikeys duur laat betaal in Kaapstad, want verloor die Kapenaars, kan hulle vierde eindig. En dan moet hulle weer Stellenbosch toe vir die halfeind.

Shimlas en UJ speel letterlik vir twee pryse. Die een is ‘n moontlike tuissemi (as Ikeys en Pukke verloor) en die ander is ‘n beste plek op die punteleer nog.

Die wedstryd gaan ‘n riller wees.

Reg, ek gaan my kop uitsteek en ‘n voorspelling maak vir Maandag se wedstryde.

Ek reken Ikeys gaan vir Tuks klop en eindig op 25 punte. Dan behoort Shimlas vir UJ in Bloemfontein te troef, so kan klaarmaak op 22 punte.

Die Pukke gaan net-net vasval teen Maties, maar ‘n bonuspunt kry omdat hulle met minder as sewe punte verloor het, wat hulle 22 punte gaan gee.

Maar hulle gaan steeds onder Shimlas eindig weens die punteverskil.

So die halfeinde gaan wees teen Maties en Pukke en Ikeys en Shimlas. Of hoe?

J.J. Harmse

Sports Writer

JJ's latest...

FNB Varsity Cup — Tue, 02 Mar 2010 08:13:00 GMT

Sjoe, wat ‘n slagting op Stellenbosch! Ek weet sulke wedstryde is nie goed vir die bemarking van die toernooi en die belangstellingsvlak van TV-kykers nie.

Maar al was die telling wat, ek kon nie ophou kyk na die Maties nie. Mensig, maar hulle is afgerond.

Die res van die wedstryde was volgens my bronne ewe spannend en daar was drama tot op die einde.

UJ het hulle kanse gehad, maar wat het hulle met Earl Lewis gedoen?

Die arme speler is óf beseer óf so onder instruksie om veilig te speel dat hy eintlik ‘n tragiese figuur was.

Hier is iemand wat op Curriebekervlak al deur spanne gehardloop het, maar gisteraand huiwerig, onseker en totaal ondoeltreffend was. Ek sluk swaar aan daardie een.

Gelukkig het die Gautengers vir Edgar Marutlulle.

Hierdie outjie, wat voorheen by die Puk was, het net daardie ietsie wat van hom ‘n ‘crowd favorite’ maak.

Die feit dat hy kan jol maak dit natuurlik makliker, maar hy is net een van daardie spelers waarvan jy moét hou.

Ek het nog nie regtig karakters in die kompetisie gekry nie, hoewel Tuks se Dirk Dippenaar een van my gunstelinge geword het.

Ek verstaan die kêrel was tot onlangs nog nooit in die gym nie, maar het sy krag van rodeo ry gekry. Hy speel ook soos ‘n bronco! Wild en ongetem. Tythan Adams het hom egter gisteraand gery, maar dit verander nie veel aam my gevoel nie.

Ikeys se Therlow Pietersen is ‘n ander. Hy is nie vir my so opwindend en onvoorspelbaar soos Lewis nie, maar is seker die mees begaafde aanvaller met die bal in hand.

My gunsteling voorryman is Tyrone Williams van NMMU en ek was bly om te hoor hulle het die Pukke ‘n slag ‘n goeie go gegee.

In Bloemfontein het TUT dit veels te laat gelos en te ver agter geraak teen Shimlas.

Twee drieë in die laaste minute het eintlik net die telbord beter laat lyk, maar daardie drieë kan Shimlas later byt as punteverskil die derde of vierde plek gaan bepaal.

Volgende week se wedstryde sal weer die punteleer verander en ek het nou reeds ‘n vermoede dat die een tussen Maties en Pukke in die laaste week weer die daaropvolgende week herhaal gaan word.

Maties en Ikeys speel ook vir tuisveld-voordeel, so daar is nog ekstra vet op die vuur vir hulle tradisionele stryd.

Tuks en Shimlas se uitslag sal ook seker een van die twee se aanslag finaal in die hek laat duik.

Na vyf weke van rugby lyk my VC XV so: Therlow Pietersen, Danie Poolman, Wayne Stevens, Franco Booysen, Dirk Dippenaar, Conrad Hoffmann, Lusu Booi, Tertius Daniller, Emile Verster, Hanno Pieterse, Marinus Pretorius, Dirco Rautenbach, Louw Adriaanse, Edgar Marutlelle, Johan Roets.

Ja, ja ek weet. Maar as jy ‘n beter span in gedagte het, laat weet gerus!

J.J. Harmse

Sports Writer

New JJ Blog post...

FNB Varsity Cup — Thu, 25 Feb 2010 11:04:00 GMT

Die Maties lyk onkeerbaar op pad na sy derde titel en die manier waarop die Kovsies getroef is, laat my wonder of die span van Stellenbosch hoegenaamd geklop kan word.

Ek weet die Vodacombeker-kompetisie begin hierdie week en sal sekerlik ‘n invloed hê op die samestelling van die spanne, maar selfs dit gaan nie juis die Maties verswak nie. Cameron Peverett kom dan nou eers terug!

Kyk, dit is seker nie die gesondste ding vir ‘n kompetisie soos die as dieselfde span elke keer wen nie. Net so, soos ek in ’n vorige blog geskryf het, dat reuse-tellings aan die orde van die dag is nie. Tog is ek aan die een kant bly dat Maties so sterk staan op die oomblik.

Dit is duidelik dat dinge reg gedoen word daar. Kyk, daar was ‘n maer jaar of twee en die kompetisie is dalk by tye effens gebuig om by die Maties se provinsiale klubverpligtinge aan te pas, maar die speelveld is tans gelyk vir almal.

En die wyse waarop die Maties voortstoom, is waarskynlik ‘n les te leer vir die ander universiteite.

Dok Craven het mos gesê as Maties sterk is, dan is WP sterk en as dit die geval is, is die Springbokke sterk. So miskien is ‘n derde oorwinning vir die Maroentruie nie so sleg nie, veral omdat die Wêreldbeker om die draai is!

Die uitslae gisteraand het behoorlik die kat in die duiwehok losgelaat. En die kat is honger en die duiwe mak!

Ek wil nie eens dink hoe gons dit in Potchefstroom nie! Daar word die vertonings van die Puk BAIE erger opgeneem as selfs die van die Luiperds, Bulle of Springbokke.

En ek wil nie Rudy Joubert wees as die Puk NIE die semi’s maak nie.

Hulle het wel nog twee ‘makliker’ wedstryde teen NMMU en TUT se Vikings, maar moet dan teen die Maties speel in ‘n wedstryd wat baie maklik hulle sukses in die kompetisie kan bepaal.

So van TUT gepraat, welgedaan. Hopelik is die lesse nou geleer dat solank julle 15 teen 15 is, het julle ‘n kans.

En uiteindelik het UJ een wedstryd volgens potensiaal gespeel!

Hopelik sal beide dié spanne nou met meer selfvertroue speel in die res van die kompetisie.

Reg, my toekenning van die week gaan aan Tukkies se Dirk Dippenaar. Hy het twee puik drieë gedruk op regtervleuel, maar benewens die feit dat hy hard en reguit hardloop as hy die bal kry, was dit opvallend dat hy nie skroom om werk te soek nie.

Net jammer van sy spanmaats speel in sulke rukke en stote.

J.J. Harmse

Sports Writer

JJ's newest blog...

FNB Varsity Cup — Tue, 16 Feb 2010 09:26:00 GMT

Sekere spelers in die Varsitybeker neem nie genoeg verantwoordelikheid oor hulle rol in die kompetisie nie.

Om deel te wees van ‘n professionale kompetisie soos dié en in wedstryde te speel wat op TV uitgesaai word, behoort elke speler ‘n interne gedragskode met homself te sluit.

Dit moet die belofte insluit om die spel volgens die gees van rugby te speel en dit moet met dieselfde dringendheid nagejaag word as waarmee sommige spelers met bisarre hairstyle, baarde en snorre op die veld draf.

Ja, dit is dalk cool om die dikste snor in die kompetisie te hê, maar wat help dit as jy ‘n onsinnige geelkaart afstaan?

Wat sommige van TUT se Vikings gisteraand probeer doen het, weet nugter.

‘n Geelkaart sit nie net jou span onder druk nie, dit neem ook iets weg van die kyker en ondersteuner wat ingeskakel of kom kyk het om waarde vir sy tyd te kry.

‘n Speler wat net aan homself dink en ‘n geelkaart kry, looi nie net sy span nie, hy verneuk ook die res van die rolspelers in die kompetisie.

Een van die groot voordele van die toernooi is dat jonger spelers vroeër blootstelling kry.

Dit help natuurlik weer die speler, want as hy presteer in die Varsitybeker, sal een van die provinsies hom opraap en kort voor lank speel hy Vodacombeker, Curriebeker en wat daarna kan volg.

Sulke spelers word gekies op grond van hulle spelpeil, fiksheid en glo dit of nie, dissipline.

Hopelik neem ‘n paar spelers notisie van dié raad.

Daar is heelwat spelers in aksie wat reeds op provinsiale vlak gespeel het, maar om een of ander rede besluit het om Varsitybeker te speel.

Een van daardie redes is sekerlik oor die goeie blootstelling wat die reeks hom bied, maar soos in UJ se geval, is sommige van daardie spelers besig om agteruit te boer. Ek weet Maties is goed, maar om so afgeransel te word, is ‘n skande vir ‘n span soos UJ. Kom ons kyk maar of hulle kan regruk.

Ek wil ‘n paar spelers uitlig wat my tot dusver beindruk het. Uiteraard het ek net ‘n paar wedstryde bygewoon en die res van die aksie op TV gesien, maar hier is my Groot Vyf tot dusver.

1) Dirco Rautenbach (Pukke-slot). 2) PW van Vuuren (Shimlas-haker). 3) Danie Poolman (Maties-vleuel). 4) Justin Wheeler (UJ-flank). 5) Franco Booysen (Tuks-senter).

J.J. Harmse

Sports Writer

New Blog Post from JJ....

FNB Varsity Cup — Tue, 09 Feb 2010 08:17:00 GMT

Die grootste vrees vir al die rolspelers in die Varsitybeker is eensydige wedstryde. Daarom sou gisteraand se tellings in die Shimlas/NMMU en Maties/TUT wedstryde nie goeie nuus gewees het nie.

Volgens alle aanduidings was beide Shimlas en Maties skitterend op stryk, maar dit moet nogtans kommer wek dat die twee verloorspanne so erg karnuffel moes word.

Die voorste ses spanne in die kompetisie kan almal mekaar klop, afhangende van die omstandighede en tuisveld, maar die Madibaz en Vikings sal beter moet vaar om hulle deelname te regverdig.

Toegegee, altwee het weg van die huis af gespeel en die Vikings was heel kompeterend verlede week teen UJ, maar hopelik sal albei spanne in die volgende paar weke beter rekenskap van hulself gee.

Komaan manne, sorg vir ‘n paar skokke! Maak julleself beroemd!

Die tuisspanne het gister almal stewig vertoon, behalwe die Tukkies wat in die laaste minuut moes toekyk hoe die oorwinning van hulle weggeruk word.

Ek was by die Tukkies-wedstryd teen UJ en was dit nou lekker.

Daar is skitterende rugby gespeel. Die drieë wat ouens soos Deon Helberg en Lolo Waka gaan druk het, was eenvoudig briljant. Altwee het die bal uit volle agterlynbewegings gekry, manne met spoed en voetwerk geklop en in die hoekie gaan afrond.

En dan het Shaun Davids seker dié drie van die jaar gedruk. Hy het maklik vier teenstanders binne UJ se kwartgebied gehinkstap en is links en regs van verslae en verslane verdedigers verby.

Maar terselfdertyd was daar ook talle foute. UJ het byvoorbeeld twee drieë op ‘n skinkbord gekry. Die eerste was ná ‘n onderskepping en toe ‘n Tuks-voorspeler naby sy doellyn die bal probeer wegskop, het hy dit net reggekry om teen ‘n teenstander vas te skop en siedaar – nog sewe punte vir UJ!

Die Tuks se laaste drie het ook gekom ná Earl Lewis ‘n baaaaaie ambisieuse skepdoel uit sy eie halfgebied probeer het – maar dit in Franco Booysen se maag vasgeskop het. Die senter kon goed 40 meter later sierlik afrond.

Terloops, hierdie Lewis-outjie gaan nog groot rugby speel.

Die gees was ook uitstekend en ek moet die ‘seremoniemeester’ AJ Valentine krediet gee, hy kan ‘n atmosfeer skep. Ek dink dinge by Tuks kan nóg lekkerder raak as hulle wel oorskuif na hulle rugbyveld toe, met die veld se graswalle en amfiteater-atmosfeer wat dinge nog meer vrolik en gemoedelik sal maak. Ek dink nie die Tukkies-spelers sal omgee nie, want die atletiekstadion het nog nie vir hulle enige geluk gebring nie!

J.J. Harmse

Sports Writer

New Blog post by JJ....

FNB Varsity Cup — Tue, 02 Feb 2010 11:23:00 GMT

Die eerste rondte van die kompetisie het nie werklik enige verrassings opgelewer nie.

Daar was, soos verwag, skitterende rugby van Maties en Pukke, fantastiese ondernemingsgees van die Ikeys en ‘n rukkerige begin vir sommige skeidsregters.

‘n Nuwe gesig of twee het ook nou al na vore getree en gewys waarom die kompetisie so ‘n uitstekende teelaarde vir talent is.

Met min verrassings was daar wel onverwagte ligpunte.

Uiteindelik wil dit lyk of Shimlas en UJ vanjaar kompeterend gaan wees.

Die manier waarop Shimlas die Ikeys laat klippe kou het, regverdig die vroeë selfvertroue wat afrigter Jaco Swanepoel in sy span gehad het.

Die Vrystaters se pak voorspelers is onder een kombers, met verskeie penkoppe wat nie te lank hoef te wag voor hulle provinsiale rugby gaan speel nie.

UJ se vertoning was eweneens ‘n ligpunt.

Toegegee, TUT se verdediging was by tye maar eina, maar die span van Johannesburg het ‘n agterlyn wat kan afrond.

Waar hulle in die verlede altyd ‘n kompeterende pak voorspelers gehad het, is daar skielik plofkrag op die punte, ‘n oog vir gapings in die middelveld en ‘n vernuftigheid by sy skakelpaar wat UJ vanjaar my vroeë semifinal-kandidate maak.

Ek het verlede week ‘n lekker gesprek met Carlos Spencer gehad en deel van die gesprek het oor die Engelse Premierliga gegaan.

Hy was vas oortuig daarvan dat daardie kompetisie net gewen kan word deur spanne wat ‘rugby’ speel en sy kandidaat om vanjaar se titel te wen is London Irish.

Spanne soos Saracens, wat tans die voorloper in die liga is, speel volgens Spencer te min rugby op die veld om end-uit voor te bly.

Wat my laat wonder het oor die verloop van die Varsity Cup? Ons weersomstandighede is wel baie anders as in Engeland, maar kan ons dieselfde hier sê?

Ek is van mening dat Ikeys die meeste ‘rugby’ speel, maar dalk nie altyd die regte rugby op die regte plekke op die veld nie.

Uiteindelik is daar egter baie min spanne in die kompetisie wat nié rugby speel nie. En dit is juis waarom die Varsitybeker so gewild is.

Proefnemings met die reels ten spyt, lê die trefkrag daarin dat die studente wil speel. En drieë druk. Solank daardie aanslag behoue bly, gaan die groeikurwe in dié reeks net boontoe.

Ter afsluiting. My speler van die week is die Shimlas se haker, PW van Vuuren. Hy was skitterend.

J.J. Harmse

Sports Writer

JJ Harmse's latest blog post...

FNB Varsity Cup — Tue, 26 Jan 2010 08:34:00 GMT

Dit is moeilik om te glo dit is al alweer sulke tyd, maar dit is.

Oor minder as ‘n week gooi ons weer kole in die Varsitybeker. Ek kan nie wag nie, want ek is siek en sat om een Heinekenbeker-wedstryd ná die ander op die kassie te volg met wentellings van 9-6. Of 12-9. Of 15-12, met al die punte via die skopvoete van die Ronan O’Gara’s van die wêreld.

Ja, dit is seker so dat die velde daar nat en modderig is, maar mensig, hoe opgewonde is ek nie om Maandagmiddag te sien hoe André Smith met sy dartellopies en vaardige hande die UJ agterlangs aan die loop kry nie.

Of om Marcello Sampson op volle vaart teen die Shimlas te sien nie.

Drieë en nogmaals drieë bly die bakermat van dié kompetisie, maar gelukkig het Suid-Afrikaanse rugby nog ‘n tiksel konserwatiewe streep in hom wat sal verseker dat die basiese bestandele van skrums, lynstane en losgemale nie verlore gaan nie.

Die Pukke het reeds aangedui dat hulle die ekstra stut op die plaasvervanger gaan benut om hulle stutfabriek tot sy reg te laat kom en ek kan myself net voorstel hoe Attie Strauss sy hande in afwagting afvryf.

Skrums en lynstane bly die fondamente van enige wedstrydplan, maar wat die studente weergawe anders maak is die doelgerigteid om drieë te druk.

En dit is waarom die Varsitybeker in so ‘n kort tydjie daarin kon slaag om soveel aanhang onder almal te verwerf.

Die spelers is mal oor drieë druk, veral in die TV-wedstryde en dit sal weer amusant wees om te sien watter driedrukker vanjaar die beste ‘post-drie’ feesvieringe het.

Ek wil my verstout om te sê dat dié prys eerder na die onverwagte driedrukker toe sal gaan. Dalk iemand soos BG Uys wat nie veronderstel is om te druk vir die Pukke nie.

Kom ons kyk vinnig wie vanjaar by die onderskeie spanne die uitblinkers kan wees.

Ek het reeds Smith genoem by UJ en dié losskakel bly een van die bestes op dié vlak. Ek dink egter die insluiting van Justin Wheeler kan deurslaggewend wees. Die flank is deur die Leeus vrygestel en UJ gaan die groot wenner wees. Hou hom dop.

Die Ikeys is sonder ‘n klomp van sy gereelde sterre, maar my nominasie daar is Mark Goosen, wat al verlede seisoen op haker uitgedraf het.

Sy basiese spel is goed, maar in die los kan die mannetjie woel en kry gereeld sy pak aan die gang.

Om uitblinkers by die Maties te soek is maklik, maar watter speler vanjaar daardie X-faktor gaan wees is geen geringe skatting nie, juis omdat daar soveel talent is. My vermoede is dat Johan Sadie die katalisator kan wees, hetsy op losskakel of binnesenter.

Sy voorgevoel en swenk is topklas.

Die Madibas sal vanjaar verskeie nuwelinge in die span hê, daarom glo ek ‘n hardebaard sal hulle deur die drif moet lei. En wie beter as veteran-voorryman, Tyrone Williams.

Ek is nie seker oor sy fiksheidspeil nie, maar soos ek Williams ken, sal hy die vure stook.

By die Pukke verwag ek van SP Marais om sensasioneel te wees. Die vleuel/heelagter het verlede jaar puik rugby vir Boland se o.21-span gespeel en doen hy so voort, gaan hy die Pukke se groot held word.

Tukkies sal weer agterlangs baie spanne gryshare gee, want in Shaun Davids en veral Franco Booysen is daar uitstekende spelskeppers. Ek verwag van Booysen om vanjaar hulle groot ster te wees.

Adillo Coutriers sal weer die kitaar by TUT slaan. Hy het ‘n reuse skopvoet en hetsy op losskakel of heelagter, sal hy altyd sorg dat sy span in spel bly.

En laaste maar nie die minste nie, die Shimlas. Kyk hier nie verder nie as losskakel Franna du Toit nie. Klas man, klas.

J.J. Harmse

Sports Writer

2010 gaan die maak-of-breek jaar van die Varsitybeker wees....

FNB Varsity Cup — Tue, 19 Jan 2010 14:14:00 GMT

Die derde weergawe van die innoverende reeks beloof om beter en groter te wees as 2008 en 2009 en te oordeel aan die ervaring van die spanne, spelers, afrigters en administrateurs, behoort vanjaar se weergawe die hoë standaarde van die eerste twee jaar te oortref. Die probleem met hoë standaarde is dat jy nie durf om dit te verslap nie en hier het die organiseerders van die kompetisie vir hulself ‘n lekker lat gepluk.

Dit kan skaars beter, maar dit moet!

Ek is nie seker dat Kurt Darren se “Kaptein, span die seile”, geklop kan word as temalied vir die kompetisie nie, maar oor die algemeen kan verwag word dat die standaard van rugby beter as voorheen gaan wees.

So wat gaan 2010 anders maak?

Die feit dat Tukkies vanjaar tuiswedstryde onder ligte kan aanbied is vir my een van die belangrikste nuwe elemente in die kompetisie. Die Pretorianers gaan beslis ‘n beter span wees as gevolg daarvan en dit sal beslis meer oemf aan die kompetisie gee.

Tuks was natuurlik in die eerste twee jare een van die beter spanne in die kompetisie, maar vir die eerste keer kan hulle studente ook die ‘gees’ van die reeks op eie bodem aanvaar en dit sal die span aanspoor.

Dit was opvallend tydens die amptelike loodsing van die kompetisie afgelope Maandag by UJ se kampus hoeveel geesdrif en afwagting daar by die onderskeie afrigters is oor die derde weergawe van die Varsitybeker.

Elkeen glo hy het die regte resep vir sukses en dit is interessant dat elkeen sy eie voorbereidingsmetodes gevolg het. Dit is net weer ‘n bewys dat rugby nie ‘n perfekte bestandeel vir sukses het nie. Al agt breiers het bestandele soos harde werk, goeie voorbereiding en talentvolle spelers in die resep, waar wie se pot die beste gaan kook as samespel, interaksie en druk begin tel, sal gesien moet word.

In vorige jare het die Varsitybeker maklik daarin geslaag om die Vodacombeker te oorskadu en homself in die harte van rugbygeesdriftiges te vestig. Ek het ‘n vermoede dit gaan nie so maklik wees vanjaar nie.

Die toetrede van die Argentynse Jaguars en Namibië in die Vodacombeker is ‘n welcome en interessante toevoeging en kan net help om bietjie lewe in daardie kompetisie te blaas.

Die Varsitybeker is natuurlik nie veronderstel om ,met enige van SA Rugby se ander kompetisies te kompeteer nie, maar as ‘n mens eerlik is, het dit wel stof in die Vodacombeker-kompetisie se oë geskop.

Die nuwe toevoegings behoort bietjie lewe in die provinsiale reeks te blaas en gebeur dit, gaan dit meer ondersteuners lok. Wat natuurlik weer eise aan dié toeskouers se tyd gaan stel om die Varsitybeker ook by te woon.

Hoe dit ookal gebeur, die rugbyondersteuner gaan die groot wenner wees en daaroor kan niemand kla nie!

J.J. Harmse

Sports Writer

JJ's latest - and last - blog for VC 2009....

FNB Varsity Cup — Wed, 01 Apr 2009 06:55:00 GMT

Dit was spannend, dit was dramaties en dit was te wagte. Die Maties is weer die land se beste universiteite span en ek dink elkeen wat oor die laaste ses, sewe weke betrokke was by die hele toernooi, sal dit eens wees dat die span van Stellenbosch verdien het om as kampioene gekroon te word.

Ondanks al die foute wat hulle in die eindstryd gemaak het, was dit hulle vermoë om die moeilike goed op die regte tye maklik te laat lyk, wat hulle uiteindelik van die res geskei het.

'n Tipiese voorbeeld daarvan was die drie wat Morné Jooste in die finaal gedruk het. Hy het vaart, uitstekende hanteerwerk en die regte opsie op die regte tyd namens sy spanmaats afgerond.

Vanjaar se toernooi was natuurlik minder skouspelagtig wat die getal drieë aanbetref, maar ek dink die hoogtepunte-pakkie steek nie af by verlede seisoen se debuutpoging nie.

Onthou dat Pukke die land se nasionale klubkampioene is en twee keer teen Maties verloor het. Dit vertel vir jou presies hoe hoog die gehalte vanjaar was.

Ook wat indiwiduele prestasies aanbetref is ons vanjaar geseen met puik vertonings.

Daar is 'n gros van die studente wat gewys het die volgende tree is net 'n volgende spankeuse ver.

Ek het toevallig die afgelope naweek van die Amerikaanse sewes-afrigter, Al Caravelli, gehoor hy gaan die Ikeys se JJ Gagiano nadertrek om vir hom te speel, juis op grond van wat hy van die bossiekop in die Varsity Cup gesien het. Gagiano het reeds 15's vir sy land gespeel, maar is insiggewend wat sewes-afrigters toenemend hier begin kyk vir talent.

Kan julle nog onthou waar Paul Treu verlede jaar vir Robert Ebersohn en Wilton Pietersen gaan haal het? En dat Chase Minnaar vanjaar vir Maties en die Springbok-sewesspan gespeel het.

Daar is baie ander voorbeelde.

Ek gaan volstaan met gelukwensinge aan Duitser Bosman en Francois Pienaar vir nog 'n seisoen van uitstaande administrasie. Daar was 'n paar moeilike beslissings wat hulle moes neem, veral oor die formaat van die toernooi en die daaropvolgende ligte-probleme.

Ek kies ook my toernooi-XV, maar voordat ek by die span kom, ook my beste rasieleier of seremoniemeester. AJ Valentine, wat vir die gees, musiek en atmosfeer by die Pukke gesorg het, was losvoor. Welgedaan, kaptein, hou die seile gespan!

My vyftiental na afloop van al die rugby is as volg: Therlow Pietersen (Ikeys), Johan Jackson (Tukkies), Tiger Bax (Ikeys), Neil Jacobs (Shimlas), Wouter Watermeyer (Pukke), Coenie van Wyk(Maties), Donald Stevens (Maties), Arné Grobbelaar (Shimlas), Willem van der Wal (Pukke), Gert Lubbe (Tukkies), Rob Andrew (UJ), Michael Passaportis (Ikeys), Louwrens Adriaanse (Maties), Stoffel Duvenhage (Pukke), BG Uys (Pukke).

Ek sal eerlik wees, ek kon nog 15 gekies het wat dié span sal opdreun. Wie dink julle is die ongelukkiges?

Sorry Tiger!

FNB Varsity Cup — Tue, 24 Mar 2009 11:21:00 GMT

Arme John Dobson. Daar word sy tuisveld, veronderstel om sy beste bondgenoot te wees, toe sy grootste vyand! Die laaste ding wat Ikeys nodig gehad het in hulle semi teen die Pukke was ongunstige toestande. En toe waai die wind letterlik die tuisspan se kanse weg.

Hulle vloeiende spelpatroon, flinke aangeewerk en ondersteunende spel wat die Ikeys so kenmerkend in die kompetisie gemaak het, kon net nie tot hulle reg kom in daardie tierende wind nie.

Dit laat egter die vraag of die Ikeys werklik veelsydig genoeg was om vanjaar te wen. Uiteindelik moet jy alle omstandighede en alle teenstanders klop om die beker omhoog te hou. Hetsy ‘n stormsterk wind of ‘n vrot skeidsregter, jy moet steeds die karakter en afwisseling in jou eie spel hê om daardie uitdagings te oorbrug.

Daarom moet jy die Pukke krediet gee. Hulle kan aanpas en het die Ikeys geklop deur geduldig te wees. Dit is ‘n baie goeie eienskap van ‘n span, veral as dit kom by die uitspeelfase van kompetisie. Dan help flash jou net soveel.

Hoe die Pukke die Maties gaan stuit weet nugter. Die vorige wedstryd tussen die twee op Stellenbosch was eenrigtingverkeer. Die Pukke het intussen heelwat verbeter en is beslis op ‘n opwaartse kurwe wat hulle spel aanbetref, maar wat sê jy dan van Maties? Hulle is op ‘n ander planeet. ‘n Handeklap ook vir Jurie Roux, Frikkie Naude en Belius Potgieter wat aan stuur staan van rugby daar.
Hulle lok duisende toeskouers week na week. En onthou, dit is die enigste stadion waar studente betaal om te kom rugby kyk! Skitterend. Wat ‘n beeld vir die spel word nie daar uitgestal nie.

Dit is opvallend hoeveel mense praat oor dié kompetisie. Oral waar ek kom en rugby is ter sprake, word die Varsity Cup deel van die gesprek. Dit het beslis deel geword van die nuwe rugbylandskap en iets wat net beter en beter sal word. Of soos Kurt Darren sing, “net op, op, op en op” kan gaan.
Darren gaan natuurlik Maandagaand by die eindstryd sy “Kaptein, span die Seile” uitbulder. Kom ons hoop net die Suidooster neem nie dié tema te ernstig op nie!

Ek het besluit om nie hierdie week ‘n span te kies nie, maar te wag tot ná die finaal. Dit sal interessant wees om te sien hoeveel dit gaan verskil van die amptelike span. Die feit van die saak is egter dat jy maklik twee, drie spanne kan kies wat kompeterend gaan wees in enige kompetisie op daardie vlak.

My speler van die week is die Maties-senter, Jean Stemmet. Hy het skitterend gespeel. In rugby moet jy vinnig opsom watter leemtes daar in die teenstanders se mondering is. Toe hy eers agterkom sy direkte teenstander is nie die vinnigste nie, was die buitegaping ‘n heerlike opsie. En daardie dummy waarmee hy die Tukkies met sy tweede drie wind as weerlig verkoop het. Lekker man, lekker!

JJ gives us the low down...

FNB Varsity Cup — Wed, 18 Mar 2009 08:18:00 GMT

Die laaste groepwedstryde was weer ‘n voorbeeld hoekom hierdie reeks so gewild is. Die laaste deelnemer aan die halfeindstryd is in die laaste sekonde van die gereelde fase bepaal!

Gelukkig vir Tukkies was die skop van Donald Stevens mis en kon hulle die oorwinning op Danie Craven-stadion behaal. Ongelukkig vir UJ, want hulle is daarmee tot die vyfde plek verdoem.

Daar is baie verwag van dié Gautengse span, maar hulle het nie op die regte tye presteer nie en vir hulle was dit ‘n geval van amper. Hulle sal maar volgende jaar weer moet probeer.

Ek was in Potch waar die Pukke gewys het hulle is nog lank nie klaar gepraat nie.
Ikeys het agterna gelyk of hulle die wedstryd gewen het, maar ek het nuus vir hulle.
Die Pukke sal nie Maandag in Kaapstad enige iets anders hoef te doen as om net te wen nie. Daar is nie die keer enige bonuspunte op die spel nie en selfs ‘n telling van 3-0 sal genoeg wees vir die besoekers.

Het die Pukke die span om Ikeys te klop? Natuurlik het hulle en veral voorlangs sal die manne van die Kaap seker nie te opgewonde wees oor die vooruitsigte om weer die klipharde Pukke aan te vat nie.
Tukkies se oorwinning was nie onverwags nie. Maties het reeds vir die halfeind gekwalifiseer en was waarskynlik in ‘n effense gemaksone.

Die Maties het niks uit die wedstryd te wenne gehad nie, terwyl die Tukkies vir oorlewing gespeel het.
Hoe Wesley Wilken daai bal met ‘n oop doellyn voor hom gaan staan en verloor het, sal net hy weet. En Stevens, wat die hele toernooi al soos ‘n masjien skop, het wraggies Tukkies nog ‘n lewe gegee.
Shimlas het hulle beste vertoning vir laaste gelos, maar volgens my vriend by die wedstryd, Vata Ngobeni van Pretoria News, was TUT pateties en het hulle boedel oorgegee.

Dit is jammer, want daar is heelwat individue daar wat nog ‘n lang pad met rugby kan stap.
Die vraag is nou in welke mate TUT kan herstel voordat hulle in Junie promosie/relegasie teen Fort Hare moet speel.

Gelukkig vir TUT gaan hulle nou Carlton-rugby speel en dit gaan hulle steeds uiters kompeterend hou. Fort Hare gaan nie daardie blootstelling hê in hulle klubreeks nie en dit kan uiteindelik die verskil wees as hulle wel teen mekaar uitdraf.
My speler van die week is BG Uys, voorryman van die Pukke. Hy is ‘n monster en het die Ikeys behoorlik kasty in die skrums.
Dit is goed om te sien hoeveel nuwe talent na vore kom wanneer ‘n mens dit die minste verwag. Uys is nie onbekend nie, maar moes byvoorbeeld tweede viool speel teen Jaco Koch. Hy het egter sy kans behoorlik aangegryp en Uys behoort in die span te wees wat ná afloop van die reeks gekies gaan word.

Hoe teenstrydig was Maandagaand se rugby nie

FNB Varsity Cup — Wed, 11 Mar 2009 07:41:00 GMT

Hoe teenstrydig was Maandagaand se rugby nie! Aan die een kant van die skaal het Maties die bal lustig rondgegooi in snikhete temperature, terwyl UJ en Tuks ‘n uur later in gietende reen van een aanslaan na die ander moes voortploeter.
Die een wedstryd het meer as vyftig punte en talle drieë tot gevolg gehad, die ander net ‘n dosyn punte.

Dit is een van die onvoorspelbare faktore wat ‘n span moet oorbrug in die reeks.

Reen dié tyd van die jaar is ‘n gegewe hier bo in die Noorde, maar nie een van die twee spanne het sekerlik verwag dat hulle so deurdrenk gaan wees nie.
Boonop het die kans om bonuspunte in te samel, by die minuut verswak.
‘n Mens het eintlik gewens dat die reen in Johannesburg met een beweging Stellenbosch toe geskuif kon word om die brande teen die berghange daar te blus.

Wisselende weersomstandighede is nie iets waarvoor spanne kan beplan nie en nog so ‘n aspek waar spanne hulleself toenemend vasloop, is die verskillende vertolkings van die skeidsregters, hulle lynregters (skuus, assistente) en die TV-skeidsregters.

Ek probeer nie vingers wys in dié verband nie, maar wil eerder op die onkonsekwentheid van die stelsel wys.

Hier is ‘n voorbeeld – sou enige van Tuks se TV-skeidsregtersbeslissings drieë gewees het as daar nie TV by die betrokke wedstryd was nie?
Wat sou die skeidsregter en lynregter gedoen het as hulle op hulle eie oordeel moes staatmaak?
Ek weet dit is ‘n hipotetiese vraag, maar ek het ‘n sterk vermoede dat Tuks dalk ‘n drie ryker sou gewees het.
Nie dat hulle verdien het om daardie wedstryd te wen nie – daarvoor het hulle skoppers meer as genoeg kanse gehad en verbrou – maar die onsekerheid of die regte beslissings geneem is, stem ‘n mens onrustig.

Die oorgretigheid van sommige assistente tydens TV-wedstryde is opvallend. Ek het vanjaar wedstryde bygewoon wat op TV was en nié was nie en dit is beslis nie dieselfde nie.

Maar dit is alles deel van die spel en iets waarmee spanne moet saamleef.

Jy moet jou eie geluk kweek – ala Gary Player – en die volgende week harder werk as dinge nie vir jou uitgewerk het nie.

Daar is tog ‘n vae onrustigheid dat die speelveld nie elke Maandag ewe gelyk is vir alle spanne nie. Die beste vier, vyf spanne in die toernooi sál so op die punteleer reflekteer word, maar die kompetisie is taai en hard genoeg. Spanne behoort nie benadeel of bevoordeel te word bloot omdat die wedstryd op TV is nie.

Uiteindelik moet die wenner van die Varsity Cup die span wees wat die beste rugby die meeste van die tyd gespeel het.

My speler van die week is UJ se Earl Lewis. Sy aanvallende benadering, selfs toe die reen op sy ergste was, getuig van ‘n speler wat in homself en sy vermoëns glo. Dié kompetisie moet sulke spelers oplewer en Lewis is ‘n bewys dat dit wel gebeur.